Ministrja e Shëndetësisë, Ogerta Manastirliu është shprehur se 5 prej pacientëve të prekur me koronavirus ndodhen në gjendje të rëndë shëndetësore.
Në një prononcim për emisionin “Open” në Top Channel, Manastirliu tha se në javët e ardhshme pritet një rritje e numrit të të prekurve nga Covid-19.
Ministrja deklaroi se numri i të infektuarve është brenda skenarëve të parashikuar.
“Kemi 73 persona në spital ku 5 paraqesin gjendje të rëndë. 4 prej tyre fatkeqësisht janë të intubuar, por dua të theksoj se kujdesi mjekësor nuk mungon. Më gëzon fakti se ka edhe të shëruar. Deri tani 5 persona kanë lënë spitalin duke u shëruar.
Italia dhe Spanja po përballen me një mal. Ne masat që kemi marrë duam që ta kalojmë si përballje me një kodër. Numri i të infektuarve është brenda skenarëve që kemi bërë. Pritet që javën që vjen ky numër të rritet. Ka studime që thonë se kjo situatë mund të zgjasë një muaj ose dhe 2 muaj”, tha Manastirliu.
