Detaje të reja janë zbardhur nga aksidenti që ndodhi mbrëmjen e djeshme në aksin Kuçovë-Urë Vajgurore, në vendin e quajtur “Meteor”, ku për pasojë humbi jetën një 40-vjeçar. Viktima është A. Domi, i cili u përplas dhe u tërhoq zvarrë nga mjeti tip “Benz” që drejtohej nga R. Dautaj.
Pas aksidentit të rëndë, drejtuesi i mjetit është larguar nga vendngjarja, por është kapur pak minuta më vonë, rreth 8 km larg vendngjarjes, në afërsi të fshatit Moravë. 32-vjeçari e kishte lënë në rrugë mjetin, për shkak të dëmtimit që kishte pësuar pas aksidentit.
Njoftimi i policisë:
Rreth orës 20.00 në aksin rrugor Ura Vajgurore – Kuçovë, në vendin e quajtur “Meteor”, shtetasi R.D., duke drejtuar mjetin e tij tip Benz, ka goditur me pasojë vdekjen shtetasin A.D, 40 vjeç banues ne fshatin Tapi, Kuçovë. Drejtuesi i mjetit është shoqëruar në ambientet e policisë për veprime të mëtejshme. Grupi hetimor po punon për zbardhjen e shkakut të aksidentit.
