Emmanuel Macron pritet të qëndrojë në Serbi gjatë ditës së sotme dhe të nesërme, në kuadër të një vizite kombëtare.
Ministria e Punëve të Brendshme njoftoi sot se do të marrë masa maksimale të sigurisë, me rastin e vizitës së Macronit, e cila do të çojë në ndryshimin e regjimit të trafikut në pjesë të caktuara të qytetit.
Mediat serbe raportojnë se presidenti Macron pritet të arrijë në Beograd rreth orës 15:00 dhe në ndër arsyet e vizitës së tij do të jetë edhe rikthimi i dialogut. Sipas lajmi.net, Macron, përveç takimit me presidentin serb, Aleksandar Vuçiç pritet të takohet edhe me përfaqësuesit e tjerë politik serbë.
Nga ana tjetër, media franceze ‘France24’ raporton se një nga temat kryesore të diskutimit të presidentit Emmanuel Macron gjatë vizitës së tij në Beograd, do të jetë Kosova, kjo pasi Macron dëshiron të ndihmojë në zgjidhjen e bllokimit të dialogut Kosovë-Serbi.
Ndërkohë, gjatë kësaj vizite Franca dhe Serbia priten të nënshkruajnë marrëveshje në fusha të ndryshme. Duhet theksuar se Samiti i Parisit kishte dështuar për shkak të qëndrimeve të Kosovës dhe Serbisë në lidhje me dialogun dhe taksën prej 100 për qind ndaj mallrave dhe produkteve serbe që ka vendosur Qeveria e Kosovës.
Mirëpo, zyrtarët e Qeverisë së Gjermanisë dhe Francës, kishin thënë se ky Samit ishte shtyrë për një afat të pacaktuar. Që nga nëntori i vitit të kaluar kur edhe Kosova kishte vendosur taksë prej 100 për qind, Serbia si “hakmarrje” ndaj kësaj takse e ka bllokuar dialogun me Kosovën.
Në anën tjetër, kancelaria gjermane, Angela Merkel dhe presidenti francez, Emmanuel Macron, janë duke bërë përpjekje që t’i bindin të dyja palët që të rikthehen në tryezën e bisedimeve.
