Pas largimit të Shkëlzen Ruçit dhe Edvan Bakajt, Luftëtari ka mbetur pa një portier që jep garanci për sezonin e ri, edhe pse klubi ka në dispozicion dy gjirokastritë si Sadik Basha dhe Avernold Qyrani.
“Panorama Sport” raporton se ka mbërritur në Gjirokastër për të nënshkruar zyrtarisht kontratën një portier 22-vjeçar grek, Panajotis Paiteris. Bëhet fjalë për një portier, prodhim i klubit të Larisës. Si titullar Paiteris ka luajtur në klubin e Ligës së Dytë greke, që drejtohet nga Arian Bellai, Apollon Larisa.
Në sezonin e fundit ishte pjesë e ekipit tjetër të qytetit të Larisës, AEL, që militon në Superligën greke. Pritet që Paiteris të firmosë për gjirokastritët, në një kohë që në ditët e ardhshme do të ketë edhe të tjera zyrtarizime nga klubi. Kryesisht drejtuesit po shikojnë më shumë tregun grek, aty ku shumë shqiptarë luajnë në të gjitha nivelet. Një emër tjetër që pritet të zyrtarizohet dhe që vjen nga futbolli grek është qendërsulmuesi shqiptar, Reno Stavre, i cili prej tri ditësh po stërvitet me Luftëtarin.
