Kryeministri Edi Rama është shprehur se masat e kufizuese janë marrë për të ulur numrin e personave që rrezikojnë jetën nga ky virus.
Në një intervistë për Vizion Plus, Rama tha se qytetarët duhet të jenë bashkëpunues dhe të respektojnë masat e ndërmarra.
“Unë mendoj që kjo është një luftë dhe luftë pa viktima nuk ka. Vazhdojmë të bëjmë këtë që po bëjmë që të ulim në maksimum numrin e viktimave”, tha ai.
Kreu i qeverisë u pyet nëse vendi jonë do merrte shembullin e vendeve tjera të cilat kanë filluar testimin masive në popullsi për të evidentuar rastet me koronavirus.
Në lidhje me këtë ai u shpreh se për këtë pjesë do vendosin ekspertët, teksa theksoi se tamponët do zhvillohen vetëm te pacientët e dyshuar me koronavirus.
“Po bëjmë atë që duhet në kohën e duhur dhe ju lutem ta bëjmë kështu deri në fund. Janë shumë pak vende të botës që e kanë aplikuar. Strategjinë këtu e përcaktojnë ekspertët. Kemi ekspertë të nivelit ndërkombëtar dhe i besoj atyre padyshim dhe do vazhdojmë si shumica dërrmuese e vendeve të botës”, deklaroi Rama.
