Mbrëmë Irani ka bërë lëvizjen e parë në hakmarrje të gjeneralit të vrarë Qasim Soleimani. Sipas mediave ndërkombëtare, dy baza ajrore në Irak janë goditur nga 35 raketa balistike. Lajmi është konfirmuar nga Departamenti i Mbrojtjes së SHBA-së.
Sipas Pentagonit është sulmuar baza në Irbil dhe Al-Asad. Sipas Tgcom deri tani janë raportuar 80 të vdekur dhe 200 të plagosur. Megjithatë, ende nuk specifikohet nëse i përkasin ushtrisë amerikane apo aleatëve të saj.
“Ne jemi të vetëdijshëm për raportet e sulmeve ndaj objekteve amerikane në Irak. Presidenti është informuar dhe po monitoron nga afër situatën dhe po këshillohet me ekipin e tij të sigurisë kombëtare,” tha zëdhënësi i Shtëpisë së Bardhë Stephanie Grisham në një deklaratë.
Për sulmin ka reaguar dhe Garda Revolucionare e Iranit. Ata deklaruan se kjo ishte hakmarrja e tyre për gjeneralin e vdekur.
“Ne po paralajmërojmë të gjithë aleatët amerikanë, të cilët i dhanë bazat e tyre ushtrisë së saj terroriste, se çdo territor që është pika fillestare e veprimeve agresive kundër Iranit do të jetë në shënjestër,” thuhet në deklaratën e televizionit shtetëror të Iranit.
