Teksa virusi misterioz kinez po përhapet me ritme të shpejta dhe rastet janë shtuar, një grup kërkuesish në Australi kanë dalë me një deklaratë të jashtëzakonshme për shtyp. Ata kanë njoftuar se kanë zhvilluar një version laboratorik të koronavirusit kinez, i pari i krijuar jashtë Kinës. Sipas tyre ky zbulim mund të ndihmojë shkencëtarët anembanë botës për zhvillimin e një vaksine më shpejtë.
Ata kanë njoftuar se mostra e krijuar prej tyre, u mor nga një pacient i infektuar dhe tashmë versioni që ata kanë krijuar do t’i jepet OBSH-së në mënyrë që të përshpejtohet krijimi i një vaksine.
“Ky është një hap, një pjesë nga “puzzle” për të cilin kontribuuam”, u shpreh entuziast zëvendës Drejtori i Institutit, Mike Catton.
Deri tani raportohet që kanë vdekur 132 persona nga koronavirusi dhe janë edhe mbi 6000 të infektuar në gjithë botën.
