Më 11 nëntor 1918, pas më shumë se 4 vjet luftimesh të tmerrshme dhe humbjes së miliona jetëve, heshtën armët në Frontin Perëndimor. Edhe pse luftimet vazhduan diku tjetër, armëpushimi midis Gjermanisë dhe aleatëve, ishte hapi i parë që i dha fund Luftës së Parë Botërore.
Ajo luftë shkaktoi rreth 40 milionë të vdekur. Prej tyre, 9-11 milionë ishin ushtarë, pjesa tjetër civilë. Këta të fundit vdiqën nga uria dhe sëmundjet. Mes tyre, ishte pandemia e tmerrshme e gripit të vitit 1918.
Ajo luftë e ndryshoi hartën e Evropës. Katër fuqi të mëdha u shpërbënë në kombe më të vogla ose u zhdukën tërësisht nga harta: Perandoria Gjermane, Austro-Hungaria, Perandoria Osmane dhe Perandoria Ruse.
Ndërkohë fituesit e luftës Franca, Britania e Madhe dhe SHBA, rivizatuan hartat e Evropës dhe Lindjes së Mesme. Gjermania u ndëshkua më rëndë nga të gjithë, dhe sipas historianëve; Traktati i Versajës nuk bëri paqe, por hodhi bazat e shpërthimit 2 dekada më vonë të Luftës së Dytë Botërore.
