Analisti Fatos Lubonja ka deklaruar se nën optikën e tij e sheh të vështirë arritjen e një marrëveshjeje midis kreut të PD-së, Lulzim Basha dhe kryeministrit Edi Ramës, pasi sipas tij nuk do të ishte në interesin personal të kryetarit të PD-së.
I ftuar në “News 24”, deklaroi se opozita duhet të bindë qytetarët se do të përfaqësojë vetëm ata nëse synon të rrëzojë Ramën.
“Përplasja është një nga mundësitë. Nënshtrimi ndaj më të fortit, që mund të jetë me ose pa përplasje dhe e treta pastaj, është një nënshtrim ndaj ndërhyrjes ndërkombëtare siç ka ndodhur që të ulen në tryezë pa ndryshimin e themelit të së keqes që është sistemi, sistemi i të keqes që kemi ndërtuar. Një ulje e sëmundjes sikur ka ato krizat e veta të forta dhe kthehet në kronike”, tha Lubonja.
Po ashtu, Lubonja thotë se sistemi që kemi në Shqipëri është kthim mbrapa i medaljes së komunizmit, ku një nomenklaturë sundon të gjithë popullin.
“Banda e madhe ka kapur të gjitha interesat, por këta po rezistojnë të mbijetojnë. Nëse arrijnë t’i bindin këta që zgjedhin se do të punojnë për këta dhe jo për atë grushtin e njerëzve, mund t’ja arrijnë. Nuk mund të jesh ti edhe me popullin e ‘Astirit’ edhe me 2-3 oligarkët që vjedhin aty. Kjo nuk është demokraci, por kthim mbrapa e medaljes së regjimit komunist ku një nomenklaturë sundonte popullin. Tani nomenklatura janë këta oligarkë që kanë bllokun”, pohoi Lubonja.
