Zëvendëskryetari i LSI-së, Luan Rama, e sheh partinë Bashkimi Demokratik për Integrim të Ali Ahmetit në Maqedoni si garant të stabilitetit dhe të ardhmes evropiane të fqinjëve tanë.
Ai ka njoftuar se ka qenë i ftuar në Kongresin e katërt zgjedhor të BDI-së, ku u morën vendime të rëndësishme për sfidat e të ardhmes. Sipas tij, Maqedonia e Veriut nuk do të ishte kjo që është sot edhe me shumë arritje të tjera për statusin e shqiptarëve atje, pa rolin e vendosur, përcaktues dhe konstruktiv të BDI-së.
Ai shprehet më tej se BDI-së i takon detyra e unifikimit të faktorit politik shqiptar në Maqedoninë e Veriut, që sfidat e afërta zgjedhore të mund t’i përballojnë së bashku.
Statusi
BDI dhe Ali Ahmeti – garantë të stabilitetit dhe të ardhmes europiane të Maqedonisë së Veriut.
Para disa ditësh u mbajt në Shkup kongresi i katërt zgjedhor i BDI-së, Bashkimit Demokratik për Integrim, partisë politike më të madhe të shqiptarëve në Maqedoninë e Veriut. Unë pata nderin të jem i ftuar e të marr pjesë në atë kongres si përfaqësues i LSI-së.
Por, nuk mund të mos e përjetoja praninë time në atë forum ku u morën vendime të rëndësishme për sfidat e të ardhmes që duhet të përballojë BDI, edhe si njëri prej atyre që e kanë ndjekur rrugëtimin; prej lindjes në rritjen, konsolidimin, modernizimin dhe faktorizimin e partisë me kryetar mikun tim të gati 30 viteve më parë Ali Ahmeti, që prej kur ushtria çlirimtare kombëtare imponoi Marrëveshjen e Ohrit e tëhu, vit pas viti e fitore pas fitoreje.
Ndaj, mund të them me bindje se Maqedonia e Veriut nuk do të ishte kjo që është sot; anëtare në NATO dhe në prag të çeljes së negociatave për anëtarësim me BE-në (e panalizuar padrejtësisht vetëm për të mos u ndarë prej saj Shqipëria!), por edhe me shumë arritje të tjera për statusin e shqiptarëve atje, pa rolin e vendosur, përcaktues dhe konstruktiv të BDI-së, si garante e stabilitetit dhe të ardhmes europiane të Maqedonisë së Veriut.
Ndërkaq, mendoj se BDI-së i takon detyra e unifikimit të faktorit politik shqiptar në Maqedoninë e Veriut, që sfidat e afërta zgjedhore të mund t’i përballojnë sëbashku, për t’i dhënë votës së qytetarëve shqiptarë në Maqedoninë e Veriut, vlerën dhe fuqinë politike reale që ajo ka.
Interesi kombëtar e kontributi ndaj shtetit që po aq sa i maqedonasve është edhe i shqiptarëve, duhet t’i udhëheqë e bashkojë shqiptarët e padyshim, më së pari liderët e tyre politikë, kah kjo konstane përbashkuese.
Kongresi i katër zgjedhor i BDI-së e konturoi më së miri e me shumë përgjegjësi këtë qasje, ndaj zgjedhjet e afërta të parakohëshme parlametare, janë një mundësi përbashkuese për shqiptarët e Maqedonisë së Veriut.
