Pas protestave dy ditore të bizneseve në Vlorë e jo vetëm, Komiteti Teknik i Ekspertëve vendosi dje shtyrjen e orës policore deri në orën 23:00. Kjo është e vetmja masë që ka ndryshuar, pasi masat e tjera anti-Covid do të mbeten njësoj si ishin. Kështu, vijon të jetë në fuqi ora policore deri në 00:00, stadiumet, teatrot me 30% të kapacitetit të tyre. Lejohen aktivitetet e teatrove, shfaqjeve artistike dhe kulturore, konferencave, me kapacitet të reduktuar deri në 30% të spektatorëve apo pjesëmarrësve, sipas protokolleve të ISHP.
Një ditë pas mbylljes së lokalave dhe bojkotit nga ana e biznesmenëve, lokalet në Lungomare i janë rikthyer punës normalisht. Ende nuk është marrë një vendim se si do të veprojnë pas orës 23:00.
Nga informacionet e marra, jo zyrtare, thuhet se ato nuk do e respektojnë këtë orë policore, por kjo mbetet për t’u parë sot në mbrëmje. Pronarët në një zë kërkojnë që të kenë në sfond muzikë deri në orën 00:00, si dhe ora policore të shtyhet deri në orën 02:00 të mëngjesit. Sipas tyre, turistët nuk duhet të shohin furgonat e policisë në këtë sezon turistik.
