Presidenti i Serbisë, Aleksandër Vuçiç ka reaguar ndaj deklaratës së homologut turk Rexhep Tajip Erdogan, i cili tha pak ditë më parë, se do të punonte për t’i siguruar Kosovës njohje të reja në arenën ndërkombëtare.
Gjatë një vizite të zhvilluar ditën e sotme në manastirin Manas, Vuçiç tha para gazetarëve se për këtë çështje, do të flasë personalisht me Erdogan, teksa shtoi se deri më 1 shtator sipas Marrëveshjes së Washingtonit palët nuk mund të lobojnë për njohje ose për çnjohje të Kosovës, shkruan media serbe B92.
“Unë do të përpiqem të flas me të. Deri më 1 shtator, sipas marrëveshjes së Ëashingtonit, të dy palët detyrohet të mos lobojnë për njohje ose çnjohje. Nëse ata fillojnë aksionin e njohjes nga 1 shtatori, ose ndoshta para kësaj, ne do ta kundërshtojmë atë”, tha Vuçiç.
Ndër të tjera, Vuçiç u shpreh se Serbia do të përpiqet që ta kundërshtojë këtë lobim nga ana e Turqisë, duke shtuar se Erdogan është shumë i fuqishëm mirëpo shpreson që të zbutet.
Serbia nuk është aq e vogël sa që nuk do të përpiqej të kundërshtonte, Na mbetet të luftojmë për vendin dhe popullin tonë. Ne nuk kemi atdhe rezervë, kështu që do të shohim. Erdogan është shumë i fuqishëm, ne nuk jemi dhe shpresoj se ai do të zbutet. Nëse ai nuk zbutet, ne do të luftojmë për vendin tonë. Dhe nga Zoti, ju do të shihni se ne nuk jemi aq të vegjël sa kam thënë”, tha Vuçiç.
