Ministri i Brendshëm, Sandër Lleshaj deklaroi ditën e sotme se krerët e policisë, prefektët dhe çdo efektiv kanë detyrë mbarëvajtjen për organizimin e zgjedhjeve vendore të 30 qershorit.
Po ashtu, ministri theksoi se në ditën e zgjedhjeve “askush nuk duhet të ketë të drejtë, mundësi apo shans që të prekë integritetin e një procesi që është thelbi i demokracisë së vendit“.
Ndërkohë, gjatë mbledhjes se sotme me anëtarët e Task Forcës Qendrore, Prefektë, Drejtore te policisë, atyre te Kufirit dhe përfaqësues nga Task Forcat Vendore, lidhur me punën dhe ecurinë e luftës kundër kultivimit të kanabisit, Lleshaj theksoi se puna e tyre në luftën kundër kanabisit do të matet me rezultate konkrete. Lleshaj u tha drejtuesve të policisë se çdo fidan kanabis i kapur para 15 qershorit është meritë e tyre, ndërsa pas kësaj date përgjegjësia do të jetë e gjitha e tyre.
“Çdo fidan që kapet në Shqipëri deri në 15 qershor është meritë e juaja, drejtuesve të policisë, çfarë kapet pas 15 qershorit, është përgjegjësi e secilit prej jush e drejtpërdrejtë. Kjo datë ndanë përgjegjësinë dhe në funksion të kësaj detyre duhet të organizohet puna në nivel vendor dhe qendror. Taks Forca drejtohet nga Rovena Voda. Nga Sot e në vijim duhet ritëm i lartë pune, takimesh dhe kontrollesh“, tha Lleshaj.
