Ministri i Brendshëm, Sandër Lleshaj, në një deklaratë për media dha vlerësimet më të larta për Policinë e Shtetit, pas qëndresës përballë protestës së opozitës së bashkuar.
Ai nënvizoi se sjelljet e djeshme të protestuesve të dhunshëm, nuk treguan gjë tjetër veçse dëshpërimin e organizatorëve të saj. Ai ka qëndruar në të njëjtën linjë me Zëvendës kryeministrin Erion Braçe, ndërsa është i mendimit se himni u përdor nga ata që s’dinë as fjalët, e as kuptimin, duke iu referuar kështu kryedemokratit Basha.
Ndër të tjera, ministri garantoi se policia do të vijojë me përkushtim luftën kundër krimit, e ndaj çdo shkelje.
“Pati më tepër dhunë, ky është një lajm i keq që tregon dëshpërimin e organizatorëve. Protesta e mbrëmshme u zhvendos në mënyrë të pabesë, tinëzare nga vendi ku ishte kërkuar tek Kryeministria drejt Parlamentit, duke krijuar pasoja të rënda, duke përfshirë qytetarë të palidhur me protestën e duke sjell dëme. Nga ana e organizatorëve nuk ishin marrë asnjë masë për sigurinë e saj, nuk ishte shpenzuar asnjë burim njerëzor apo material që protesta të zhvillohej brenda hullisë ligjore. Përkundrazi nga organizatorët ishin marrë masa për të hartuar plan sulmi dhe për të përdorur dhunë kundër institucioneve kushtetuese. Gjatë protestës u konsumuan thirrje të hapura antikushtetuese, për dhunë, për revolucion”, deklaroi ministri i Brendshëm.
Lleshaj tha se u përdor një arsenal lëndësh shpërthyese të ndaluara e të rrezikshme, nga të cilat u shkaktuan dëme të mëdha.
“Protesta kontribuoi edhe njëherë për ta zhvendosur vëmendjen e policisë nga krimi tek protesta. Policia dha shembull dinjiteti, dhunuesit një tjetër arsye për t’u braktisur nga çdo qytetar. Policia reagoi me profesionalizëm ndaj njerëzve që kanë vrarë”, u shpreh ministri Lleshaj.
