Konstitucionalisti i njohur, Shkëlqim Hajdari, është shprehur se të gjithë palët politike duhet t’i mbështesin listat e hapura.
I ftuar në emisionin Repolitix, Hajdari tha se kryetari i opozitës, Lulzim Basha, duhet të ishte i pari që ta përqafonte këtë nismë. Sipas tij, merita për hapjen e listave i shkon kryeministrit Rama.
“Të gjithë duhet t’i përqafojnë listat e hapura. Unë ndjej dhimbje të madhe për kryetarin e opozitës, juristin Lulzim Basha. Ai duhet të ishte flamurtar i listave të hapura. Ai duhet të ishte flamurtari. Por ai nuk qe flamurtari. Thoni çfarë të doni këtu. Unë nuk bëj politikë. Me gjithë presionin që i bënin deputetët që ishin brenda me Rudinën, me Myslymin etj. Duhet t’i japim Çezarit atë që i takon Çezarit. Po të mos donte kryeministri Rama, ai ndryshim nuk ndodhte. A është gjithçka? Jo, nuk është gjithçka. Duhet të vazhdojë. Ne kemi gjithë kohën e duhur që të vazhdojë presioni politik që ne komisionet të paktën t’i bëjmë të depolitizuara, në një formë”, tha ai.
“Mund të bëhen tani këto?”, pyet gazetari.
“Si nuk bëhen?! Deri në prill? Po të ketë vullnet si nuk bëhen gjërat. Patjetër që bëhen”, shtoi Hajdari.
