Gjatë këtyre ditëve të izolimit, shumë qytetarë kanë abuzuar me lejet e marra për të udhëtuar me mjetin e tyre. Ndonëse thirrja e vazhdueshme e kryeministrit Rama ka qenë që mjeti të shfrytëzohet për vajtje-ardhje nga puna, shumë qytetarë e kanë shfrytëzuar edhe për shëtitje.
Drejtori i Përgjithshëm i Policisë së Shtetit, Ardi Veliu, ka bërë një inspektim për monitorimin e zbatimit të masave kufizuese, me qëllim parandalimin e përhapjes së koronavirusit.
Në një prononcim për mediat, Veliu ka theksuar se do lejohen të qarkullojnë pa limit vetëm makinat e transportit të mallrave.
E ndërsa makinat e vogla të bizneseve, do të lejohen të qarkullojnë vetëm në fashat orare të lejuara, me qëllim vajtjen në punë dhe kthimin në banesë.
Njoftimi
Mesditën e sotme, Drejtor Veliu, së bashku me Drejtorin e Departamentit për Sigurinë Gjovalin Loka dhe Drejtorin e DVP Tiranë Rebani Jaupi, ka parë nga afër zbatimin e masave kufizuese, në lidhje me qarkullimin e mjeteve të lejuara, si dhe të këmbësorëve me autorizime nga e-Albania.
Drejtor Veliu ka porositur shërbimet që të mos tolerojnë asnjë drejtues mjeti 4+1, i cili pavarësisht autorizimit që mund të ketë, lëviz jashtë fashave orare të lejuara, si dhe jashtë destinacionit për të cilin ka marrë autorizim.
Gjatë një prononcimi për mediat, Drejtori i Përgjithshëm Ardi Veliu ka theksuar se do lejohen të qarkullojnë pa limit, vetëm makinat e transportit të mallrave, ndërsa makinat e vogla të bizneseve do të lejohen të qarkullojnë vetëm në fashat orare të lejuara, me qëllim vajtjen në punë dhe kthimin në banesë.
Ndërsa, për emergjencat mjekësore, nuk ka nevojë për autorizim, por duhet të telefonojnë në numrin 112 ose 129, për të dhënë të dhënat dhe targën e mjetit me të cilin do të kryejnë lëvizjen.
Veliu ka apeluar për të gjithë qytetarët që të zbatojnë masat kufizuese, duke lëvizur vetëm një pjesëtar i familjes, me lejen e marrë nga e-Albania, për të bërë pazar dhe për arsye tjetër.
Së fundmi, Policia e Shtetit, në funksion të zbatimit të monitorimit të masave kufizuese, ka nisur kontrollin e territorit me anë të dronëve.
