Kryeministri Edi Rama njoftoi pak më herët se ditën e nesërme deri në orën 11 të paradites, do të lejohen të dalin për ajrosje vetëm të moshuarit.
Në lidhje me këtë njoftim ka reaguar edhe Policia e Shtetit, e cila thekson se do të kujdeset që kjo liri dalje të bëhet në mënyrën e duhur dhe duke respektuar distancimin social.
Përmes një njoftimi të shpërndarë për mediat, policia i bën thirrje të moshuarve që të mos ulen në grupe nëpër parqe, apo lulishte dhe të mos jenë më shumë se dy persona bashkë. Policia rithekson se pas orës 11:00, të gjithë pa përjashtim duhet të kthehen në banesat e tyre.
Njoftimi i plotë:
Bazuar në urdhrin e fundit të Kryeministrit të vendit, për lejimin e pensionistëve për të dalë ditën e shtunë deri në orën 11:00, Policia e Shtetit do të mirëpresë e asistojë pensionistët, për të respektuar distancimin social.
Policia e Shtetit kërkon mirëkuptimin e pensionistëve që të mos ulen në grupe nëpër parqe apo lulishte, të mos jenë më shumë se dy persona bashkë dhe pas orës 11:00, duhet të kthehen në banesë. Shërbimet e Policisë do të jenë pranë tyre për çdo rast nevoje që ata mund të kenë.
Ndërkohë, në të gjithë vendin do të vijojnë kontrollet e pandërprera kryesisht në qendrat urbane, për respektimin e karantinës. Do të lejohen të qarkullojnë me makinë, të pajisur me autorizim apo në këmbë, në itinerarin shtëpi – punë – shtëpi, pa asnjë ndalesë të gjithë personat që kanë autorizim për të punuar gjatë fundjavës.
Të gjithë të tjerët duhet të respektojnë masat kufizuese për të mos dalë nga banesa deri në orën 05:00 të ditës së hënë, duke përjashtuar lëvizjet për emergjencat mjekësore.
