Deputeti Korab Lita ka mbajtur mëngjesin e sotëm një konferencë për shtyp, në të cilën sqaron se kryetar i grupit parlamentar demokrat është ai, teksa ka shprehur mirënjohjen për kërkesat e deputetëve që duan t’i bashkohen grupit.
“Disa deputetë kanë shprehur dëshirën ti bashkohen grupit tonë. Si kryetar i këtij grupi jam ende në pritje të shkresave. Ndërkohë shpreh mirënjohjen kolegëve deputetë që duan të bashkohen. Sapo të kemi shkresat e tyre do ti shqyrtojmë”, u shpreh Lita.
Duke iu referuar deklaratës së kryeparlamentarit, Gramoz Ruçi, i cili pak ditë më parë u shpreh se Rudina Hajdari është ende kryetare dhe se duhet ta zgjidhin vetë këtë situatë, Lita iu drejtua atij që të mos ndërhynte në grupin e tyre.
“Asnjë deputet nuk mund ti bashkëngjitet grupit demokrat se do Gramoz Ruçi që të mbajë Rudina Hajdarin. I bëj thirrje të mos fusë hundët, nuk e vendos ia kush hyn dhe kush ikën nga grupi jonë. Ne jemi në Kuvend jemi për të mbështetur reformat, si dhe axhendën e SHBA për politikanët e korruptuar. Grupi dhe unë si kryetar, i shprehim mirënjohjen Rudina Hajdarit si kryetare e Reformës Zgjedhore. Duhet ti tërheqim vëmendjen se ajo është aty si përfaqësuese e opozitës parlamentare dhe jo e Gramoz Ruçit”, tha ai.
Ndërkohë në lidhje me këtë rast ka reaguar edhe Rudina Hajdari, e cila akuzoi tre deputetët Alban Zeneli, Arben Elezi dhe Korab Lita për shkarkimin e saj nga posti, pasi sipas saj ata po mundohen të largojnë vëmendjen nga hapja e negociatave.
