Një çifti në Berat u ka shpërthyer bombola e gazit, pasi ishin ‘harruar’ pas telenovelave. Gjatë mesditës së sotme, një zjarr i fuqishëm ka rënë në një banesë në zonën e ish/merkatos në lagjen “13 Shtatori” në Berat.
Banesa e Astrit Pashës është përfshirë nga flakët, pas shpërthimit të një bombole të vogël gazi. Çifti kishte vendosur gjellën në zjarr, por në të njëjtën kohë ishin fokusuar tek telenovelat.
Pas djegies së tenxheres, ka shpërthyer edhe bombola e gazit, që fatmirësisht nuk ka qenë e mbushur plotësisht. Pas shpërthimit të flakëve të zjarrit, kryefamiljari ka dalë jashtë banesës me gruan, dhe ka njoftuar zjarrfikësen. Fatmirësisht zjarrfikësit kanë shuar flakët. Pjesa më e madhe e banesës është shkrumbuar, por fatmirësisht çifti Pasha nuk është lënduar.
