Zv.kryeministri, Erion Braçe, teksa ka bërë një bilanc të situatës pas tërmetit, konfirmoi se çdo gjë vijon normalisht. Me anë të një deklarate për mediat, ai qetësoi qytetarët se infrastruktura rrugore, sociale, shëndetësore, e rendit dhe e sigurisë janë të sigurta.
Duke koordinuar punën në terren, zv.kryeministri nënvizoi se shteti është funksional, dhe se nuk ka asnjë element për të krijuar panik.
Po kështu, Braçe shtoi se edhe Policia e Shtetit ka 48 orë në gatishmëri, për t’iu përgjigjur çdo qytetari. Referuar lajmit të djeshëm, se në orën 23:30 Shqipëria do të goditej nga një tërmet shkatërrues, krijoi panik tek qytetarët. Zv.kryeministri garantoi se kjo lojë do të marrë fund, dhe se qeveria është e vendosur për ti shkuar deri në fund kësaj beteje.
“Dje shoqëria shqiptare, siguria publike dhe kombëtare, ligji penal, u sfidua, u kërcënua, në kufijtë e kaosit, me dhunë dhe plaçkitje të mundshme. Nga lajmi i rremë i fabrikuar qëllimisht nga Syri.net, shembull i gazetarisë kriminale, politike dhe të kapur.
Por kërcënimi serioz i rendit kushtetues, sigurisë publike dhe kombëtare kërkon të njëjtën vendosmëri për t’u përballur ligjërisht me lajmet e rreme, prodhuar në media dhe shpërndarë nga një rrjet kriminal dhe që dje shkaktoi panikun më të madh që mund të kishte pasoja shumë të rënda për jetën e qytetarëve dhe pronën. Çdo gërmë në atë lajm ishte e qëllimshme dhe ishte e rreme.
Referimi në Top Channel me sizmologun grek, që për fat të keq po kërkon të bëhet protagonist, ishin të rremë. Çdo gërmë ishte e paligjshme për lënien e shtëpive, por edhe pse jo rrezikimin e njerëzve në rrugë.
Autorët e këtij lajmi të rremë dhe zotëruesit e këtij rrjeti kriminal të përhapjes së ketyre lajmeve të përballen me fuqinë 5.8 ballë me intensitet 8 ballë. Të bëjnë ç’të duan të sajojnë alibinë e asaj që ndodhi, çdo gjë është e faktuar. Forca e ligjit do i japë fund këtij fenomeni njëherë e mirë.
Loja me lajmet e rreme që kërcënon jetën e qytetarëve, do të marrë fund tani ligjërisht edhe për një arsye tjetër, për t’i dhënë lirinë qytetarëve të marrin informacion e duhur. Askush nuk do të ketë ndërmend lotët e përpëlitjet e foshnjeve në shkallët e pallateve, apo në makinat e prindërve. Nuk kam ndërmend të fal ankthin e prindërve.
Kush nga këta që mendon se çudia më e madhe zgjat tre ditë, apo që do i dalë për zot cilindo politikan madje edhe ai që për 30 vite ta poshtërojë këtë popull duke ngjallur frikë dhe panik, do të përballet me ligjin deri në fund dhe do të marrin atë që meritojnë.
Kemi zgjedhur që punën ta bëjmë drejtpërdrejtë nga terreni. Nuk e bëjmë për t’i treguar njerëzve se çfarë bëjmë ne, por për t’i treguar të tjerë njerëzve se çfarë duhet të bëjnë para se të dalin në televizor.
Ju konfirmoj se e gjithë infrastruktura rrugore është e sigurt. E gjithë infrastruktura e ujësjellësve është e aksesueshme dhe e sigurt. E gjithë infrastruktura energjetike është e aksesueshme dhe e sigurt. E gjithë infrastruktura shëndetësore është e aksesueshme dhe në funksion të plotë. E gjithë infrastruktura arsimore është e aksesueshme.
Shteti është funksional dhe po shërben me të gjithë fuqinë e tij. Nuk ka asnjë element të kaosit, neglizhencës apo të moskryerjes së detyrës.
Kryeministri po udhëheq të gjithë menaxhim e kësaj situate. Ministrja e Mbrojtjes, një supergrua, ka 48 orë në krye të menaxhimit të emergjencave civile dhe çdo strukture tjetër të ngritur menjëherë në funksion të përballimit të kësaj emergjence, atje te njerëzit”, tha Braçe.
