Në mbledhjen e jashtëzakonshme të qeverisë, mbajtur ditën e sotme, kryeministri Edi Rama kërkoi që pas shembjes së pallateve të verifikuara si të pabanueshme nga tërmeti i 26 nëntorit, të ndërtohen lagje model në Tiranë, Durrës dhe Laç.
Kreu i qeverisë deklaroi se në objektivin afatmesëm duhet të rindërtohen 10 mijë apartamente, ndërsa theksoi se për 12 deri në 18 muaj, 5 mijë të tilla. “Për programin e rindërtimit me objektiv afatmesëm 10 mijë apartamente dhe afatshkurtër, 12-18 muaj, 5 mijë apartamente, pa llogaritur infrastrukturën”.
“Duhet të jemi shumë të kujdesshëm dhe të vëmendshëm në pikat ku janë krijuar hapësira për shkak të shembjeve. Të mos jenë pika hajde këtu po ndërtojmë por të jenë hapësira të shihen si potencial për zhvillimin e qytetit dhe me parqet e kujtesës dhe me infrastrukturë.
Ashtu siç jemi të qartë që duhet një ndërhyrje e fortë në Kombinat, prishje e atyre godinave dhe ndërtimi i një blloku të ri banesash për të akomoduar gjithë ata njerëz që do humbasin shtëpinë aty.
Një pikë tjetër tek ‘5 maji’ pranë lumit, është një zonë ku mund të bëjmë spostime, sepse pjesët më të prekura në kryeqytet janë Kombinati dhe zona e njësisë 4. Aty mund të bëjmë një lagje tjetër dhe një tjetër tek ish-uzina e Autotraktorëve”, u shpreh kryeministri.
Sa i përket dëmtimeve të banesave në Laç, Rama nënvizoi se duhet të ndërtojmë një lagje tërësisht të re në këtë qytet, me parametra të rinj.
“Të gjitha pallatet që vizitova unë, pallatet e revolucionit demokratik duhet të shemben. Të kemi dhe në Laç një lagje krejt të re të ndërtuar me parametra të rinj. Filloni shembjen, komunikoni me banorët për të marrë gjërat që kanë brenda, ndihmojini t’i nxjerrin dhe filloni shembjen.
Të fillojmë bashkëpunimin me agjencinë shtetërore të Turqisë që premtimi i presidentit të Turqisë për të ndërtuar 500 shtëpi të realizohet”, tha kryeministri Rama.
