Ditën e djeshme qarkulloi në media lajmi se gazetarja e sportit, Ilda Bejleri, kishte aksidentuar një grua dhe ishte larguar më pas nga vendngjarja.
Ngjarja u regjistrua dje rreth orës 12:50 në bulevardin “Gjergj Fishta”. Moderatorja e mohoi fillimisht këtë lajm, por më pas ishte policia që nëpërmjet pamjeve të kapura nga kamerat e sigurisë, pohoi që drejtuesja e mjetit ishte Ilda Bejleri.
Ajo u shoqërua në polici, ndërsa u la e lirë pas disa momentesh. Ajo ka reaguar sërish nëpërmjet një postimi në Instagram, në lidhje me të gjitha lajmet që u publikuan për të në media.
Përmes një Instastory, gazetarja tregon se ajo nuk e ka përplasur gruan, por se ajo është rrëzuar vetë teksa po kalonte rrugën me nxitim. Sipas saj, këtë gjë e verifikojnë edhe kamerat e sigurisë që policia ka.
“O ju mer-diat shqiptare. Për fatin tim të mirë kamerat janë hapur në polici, dhe është vërtetuar që makina ime ka qenë e ndaluar në momentin që zonja është rrëzuar në nxitim e sipër për të kaluar rrugën edhe pse semafori jeshil ishte i hapur për makinat. Kush ka ndonjë dyshim të shkojë të shohë videon në polici.
Unë pyeta për zonjën në momentin e parë por më pas duke qenë se makina ime në momentin e rrëzimit nuk ishte në ecje e sipër nuk ndjeva që kisha bërë diçka për t’u ndjerë fajtore. Të gjitha makinat e tjera u larguan por unë qëndrova pak, por nuk ndjeva asnjë detyrim që të qëndroja më shumë se nuk mbaj përgjegjësi për njerëzit që rrëzohen në rrugë. Zonja për fat të mirë është shëndoshë e mirë, flini të qetë o njerëz”, shkruan ajo në postimin e saj.
Mësohet se bukuroshja e ekranit do të hetohet për rastin në fjalë nga prokuroria.
