Policia e Shtetit ende vijon kërkimin e dy shqiptarëve super të rrezikshëm, të dy të dënuar me burg të përjetshëm.
Bëhet fjalë për Gleron Jahjollim dhe Fran Prendin.
Sipas Policisë, në datën 23 tetor 2001, në dalje të fshatit Menkulas, Devoll, shtetasi Gleron Jahjolli, në bashkëpunim me shtetasin E. J., ka qëlluar me breshëri automatiku në drejtim të një automjeti, brenda të cilit ndodheshin 3 shtetas, konkretisht shtetasi A. N. (drejtuesi i mjetit, i cili mbeti i vdekur) dhe pasagjerë shtetasit J. K. dhe R. N.
Gleron Jahjolli është dënuar me burgim të përjetshëm nga Gjykata e Rrethit Gjyqësor Korçë, për veprat penale “Vrasja në rrethana cilësuese kundër dy ose më shumë personave, kryer në bashkëpunim” dhe “Armëmbajtja pa leje”.
Ndërsa nga ana tjetër Fran Prendi, në datën 9 mars 1992, në vendin e quajtur “Rezervuari i qytetit”, Pukë, ka vrarë për motive të dobëta shtetasin H. B.
Shtetasi Fran Prendi është dënuar me burgim të përjetshëm nga Gjykata e Rrethit Gjyqësor Pukë, për veprën penale “Vrasja me dashje, për motive të dobëta”.
