Nga: Gabriel Power “The Week”
Një samit i liderëve të Bashkimit Evropian, për të zgjedhur presidentin e ardhshëm të Komisionit Evropian u pezullua mesditën e të hënës, pasi 3 ditët e bisedimeve intensive midis tyre, hynë në ngërç. Ligjbërësit kryesorë të BE-së janë mbledhur në Bruksel, për të vendosur se kush do të pasojë në detyrë luksenmburgasin Jean-Claude Juncker, dhe “shpresuan në arritjen e një marrëveshje mbrëmjen e dielës”, raportoi BBC.
Por të hënën në mesditë, bisedimet u bllokuan, për shkak të debateve të forta midis mbështetësve dhe kundërshtarëve të kandidaturës së socialdemokratit holandez Frans Timmermans, zëvendësi aktual i Juncker, dhe kandidati kryesor për të marrë drejtimin e Komisionit Evropian. Diskutimet mbi kandidaturën e debatueshme të Timmermans, do të rifillojnë sot kur liderët e BE të takohen prapë. E përditshmja britanike “The Guardian”, raporton se qeveritë populiste të krahut të djathtë në Poloni, Hungari, Republika Çeke dhe Sllovaki – një bllok i njohur si Grupi i Vishegradit – duket se mund të përpiqen të bllokojë emërimin e socialdemokratit, për shkak se ai ka qënë një “kritik i qeverive populiste, që sipas tij kanë dobësuar pavarësinë e gjyqësorit në këto vende”.
Kryeministri polak Mateusz Morawiecki, ka deklaruar se Timmermans “nuk është një kandidat i dakordësuar”, por “një kandidat që përçan Evropën”. Partia Popullore Evropiane (PPE), grupimi më i madh politik në BE, u përpoq të zgjidhë ngërçin të dielën, duke paraqitur një listë emërimesh kompromisi, sipas së cilës kristiandemokrati gjerman Manfred Weber do të merrte drejtimin e Komisionit Evropian, duke e ndarë mandatin 5-vjeçar me ish-kryeministrin liberal belg, Guy Verhofstadt.
Por “Deutsche Welle”, duke cituar burime të afërta me zyrtarët e BE-së, raporton se Weber është eliminuar nga gara, pasi nuk ka siguruar mbështetje të mjaftueshme nga udhëheqësit e Bashkimit Evropian, si dhe nga grupet e ndryshme të partive europiane. Ajo shton se kancelarja gjermane Angela Merkel, që mbështeste Weberin”, e ka pranuar tashmë këtë vendim”.
Një nga kundërshtarët më të fortë të kandidaturës së Weber në krye të këtij posti, është presidenti francez Emmanuel Macron, që besohet të jetë në favor të një kandidati më liberal, sikurse është Margrethe Vestager, komisionerja evropiane e konkurrencës, raporton “The Daily Telegraph”.
Blloku gjithnjë e në rritje i të Gjelbërve në Evropë, thuhet se mbështet një zgjidhje që e vendos Timmermans në krye të Komisionit Evropian, dhe Ëeberin në krye të Parlamentit Evropian, raporton “Euractiv”.
Uebsajti me qendër në Londër, thotë se emra të tjerë përfshijnë ish-kryeministrin e Belgjikës, Charles Michel, kreun e Bankës Botërore, bullgaren Kristalina Georgieva, apo presidenten në largim të Lituanisë, Dalia Grybauskaite. “The Telegraph”, shton se zyrtarët e BE-së janë “të prirur të shmangin vendimin për të votuar nominalisht”, por shton se “nëse dikush e kërkon këtë, do të duhen 21 vende, që përfaqësojnë 65 për qind të popullsisë së përgjithshme prej 500 milionë banorësh të unionit, që të kalojë çdo propozim”.
“The Guardian”, vëren se Theresa May, për herë të fundit në Bruksel si kryeministre e Britanisë së Madhe, do të mbetet në një “pozicion potencialisht të vështirë”, nëse disa blloqe do të vazhdojnë me miratimin e kandidatëve të ndryshëm.
Gazeta llogarit se nëse shkohet në votim, dhe Italia vendos t’i bashkohet Grupit të Vishegradit në bllokimin e kandidaturës së Timmermans, Britanisë së Madhe do t’i mbetet në dorë vota vendimtare, pavarësisht përpjekjeve të njëkohshme për të ndërprerë lidhjet e saj me BE-në.
Ndërkohë kompanitë e basteve, thonë se përkundër gjasave në fillim të këtij viti, nga favorit në raportin 2/1 për të pasuar Junckerin, Weber ka rënë tashmë në vendin e katërt me një probabilitet 7/1, sipas Smarkets. Përpara tij në vendin e tretë, ndodhen Vestager dhe Barnier me 4/1, ndërsa Timmermans mbetet favoriti nr.1 me një probabilitet 3/1.
TIRANA TODAY
