Kryeministri në detyrë, Albin Kurti, ka rikujtuar punët e Qeverisë në muajt e parë. Në një deklaratë të shpërndarë në Facebook, ai shprehet se 6 tetori është data kur u bë ndarja nga e kaluara e dhimbshme dhe e ardhmja e ndritshme.
Kurti përmes një video-mesazhi shprehet më tej se qeveria u rrëzua, sepse synohet një marrëveshje e shpejtë për copëtimin e territoreve, gjë që sipas tij, nuk mund t’i bënin me këtë qeveri.
“Sigurisht edhe ditë e rezistencës për sistemin e vjetër, i cili i shërbente një pakice të shoqërisë. Edhe pse duket sikur ka kaluar shumë kohë, për mua ende është i freskët entuziazmi i madh 6 tetorit.
6 tetori është data kur e bëmë prerjen nga e kaluara e dhimbshme, drejt një të ardhme të ndritshme, prandaj nuk mund të kthehemi prapa. Unë kurrë nuk kam thënë që ndryshimi është i lehtë, por është i mundshëm. Por kundërshtarët që janë kundër ndryshimit, e kanë më të vështirë se ne. Unë nuk i kuptoj kundërshtarët për përpjekjet absurde, por i kuptoj për vështirësitë që kanë”, ka thënë ai.
Ai ka thënë se qeveria u rrëzua, sepse duan një marrëveshje të shpejtë për gjendje të jashtëzakonshme e copëtim të territoreve.
“Ne ende nuk e dimë ç’ka ka në marrëveshjen me Listën Serbe. Të premten e pamë se si u nxor një dekret jo kushtetues. Unë e kuptoj presidentin ceremonial që punët ka dëshirë t’i mbarojë jashtë orarit e jashtë ligjit, ama këtë nuk mund ta pranojmë e as lejojmë”, ka shtuar ai.
Sipas tij, kriza politike ishte e paarsyeshme dhe e panevojshme. “Te ne pamë se si disa aktorë në vend, në vend se të fokusoheshin në luftimin e përbashkët të pandemisë, luftuan kryeministrin. Një opozitë dhe një president që virusin nuk e shihnin si rrezik për qytetarët nga i cili duhet shapërtuar por si mundësi për vetën e tyre për të përfituar. Presidenti, opozita dhe partneri ynë i koalicionit u bënë bashkë, që krizës shëndetësore t’ia shtonin edhe një të tillë politike. Kriza politike ishte e paarsyeshme dhe e panevojshme”, ka thënë ai.
Kurti citoi se me të si kryeministër, nuk mund të shpallet gjendje e jashtëzakonshme. “Ju duhet të jeni krenar, sepse po tregojmë se nuk na mungon dija as vullneti për ta bërë shtetin që duam. Këta muaj kanë qenë përplot me ngjarje, dhe ajo më e rënda ishte ajo me virusin korona. Ne po e menaxhonim mirë pandeminë, dhe po e zbatonim programin qeverisës. Qeveria nuk u rrëzua për shkak të mospunës së saj, por përpikërish për punën e mirë në luftën e korrupsionit. Me mua si kryeministër, nuk lejojmë shpalljen e panevojshme të gjendjes së pazakonshme. Covid19 nuk ishte zgjidhje e qytetarëve as qeverisë, por realitet që duhet të përballemi. Kriza e ka rënduar shumë ekonominë dhe tashmë atë po e ndjejmë”, ka thënë ai.
