Kryeministri i Kosovës Albin Kurti ka nxjerrë të pathënat në lidhje me mocionin e mosbesimit që është propozuar nga Grupi Parlamentar i Lidhjes Demokratike të Kosovës.
LDK kërkon të rrëzojë qeverinë Kurti, mirëpo sipas kryeministrit të Kosovës i gjithë ky mocion nuk ka lidhje me ministrin e shkarkuar Agim Veliu, siç u aludua nga opinioni publik.
“Motori i këtij nxitimi s’ka të bëjë me ministrin e shkarkuar, as me tërheqjen e trupave të SHBA, por me një marrëveshje të gatshme për shkëmbim territori me Serbinë. Ky pazar presidencial e kërkon dorëheqjen e qeverisë”, theksoi Kurti.
Në vijim, kreu i qeverisë së Kosovës renditi arritjet që janë bërë në Kosovë prej kohës kur ai u zgjodh kryeministër.
“Mua nuk më dhimbset vetja. Ky mocion synon ta lejë popullin pa qeverinë që ka votuar, qeverinë reformatore që e lufton korrupsionin. Po doni ta lini pa qeveri mu në mes të pandemisë së koronavirusit në një kohë që ne po japim një shembull të mirë për menaxhimin e kësaj pandemie.
Populli e di që unë nuk e kam mbështetjen tuaj, por ju të gjithë e dini që kjo qeveri ka mbështetjen e qytetarëve se padrejtësisë ndaj tyre iu shtua edhe rreziku nga korona”, tha Kurti.
