Kryeministri ende në detyrë i Kosovës, Albin Kurti ka folur në lidhje me mocionin e mosbesimit që u votua para pak ditësh në Kosovë.
I ftuar në KTV, Kurti theksoi se mocioni ndaj tij nuk u ngrit vetëm ngaqë shkarkoi ministrin e Brendshëm, Agim Veliu.
“Për një ministër nuk bie kurrë qeveria”, u shpreh Kurti, teksa shtoi se edhe nëse do kthehej pas, vendimi i tij do të ishte i njëjtë.
“Për mua ishte jetike që kur e kam parë deklaratën e ministrit, që jam dakord me propozimin për të shpallur gjendjen e jashtëzakonshme”, tha Kurti.
Ndërkohë në këtë emision është hapur edhe sondazh me pyetjen “A duhet të jetë Albin Kurti kryeministri i ardhshëm i Kosovës?”.
Deri më tani 94% e atyre që kanë votuar shprehen ‘pro’ këtij propozimi, ndërsa vetëm 6% e tyre shprehen kundër.
Ndërkohë edhe kreu i LDK-së, Isa Mustafa ndodhet live në Klan Kosova, ku po tregon versionin e tij të ngjarjes.
Mirëpo duke qenë se të dyja intervistat po transmetohen live në Facebook, mund të bëhet edhe një krahasim se cila po merr shikueshmërinë më të lartë.
Intervista e Albin Kurtit po ndiqet nga pothuajse 60 mijë persona, ndërsa ajo e kreut të LDK-së vetëm nga 3,600 shikues.
