Kryetari i Komisionit Hetimor, Ulsi Manja, ka folur në lidhje me axhendën e ngritur për të konstatuar shkeljet e Ilir Metës.
Në një intervistë për ABC News, Manjau shpreh se puna e tij vijon dhe se punimet do të përfundojnë përpara kohës së parashikuar.
Sipas tij, mazhoranca do të japë një votë politike për shkarkimin e presidentit Meta, ndërsa vlerësimin kushtetues do ta bëjë vetëm Gjykata Kushtetuese kur të jetë funksionale.
“Brenda afatit të ri që morëm nga Kuvendi, komisioni hetimor do ta përfundojë punën e vetë. Do të zbatojmë planin përfundimtar të hetimit të miratuar nga Komisioni. Do të administrohen provat shkresore, dhe këtu e kam fjalën për opinionin paraprak dhe final të Komisionit të Venecias, do të administrohet dhe shkresa e ardhur nga Presidenti i Republikës lidhur me arsyet që e shtynë të anulojë 30 qershorin, duke respektuar tërësisht klauzolat ligjore për informacionin e klasifikuar ‘sekret shtetëror’”, deklaroi Manja.
Ndërkohë që Komisionit Hetimor i mbaron mandati më 8 dhjetor, drejtuesi i tij, Ulsi Manja ende nuk shprehet i bindur nëse do ta votojë personalisht në Kuvend shkarkimin e Metës apo jo.
“Komisioni është i detyruar të mbyllë punë që i ka ngarkuar Kuvendi me vendimin nr 84 të vitit 2019. Është një komision që i kërkohet një vlerësim në aspektin ligjor nëse Presidenti e ka shkelur ose jo Kushtetutën, dhe raporti i këtij komisioni hetimor i tillë do të jetë. Më pas seanca plenare vendos politikisht për shkarkimin e Presidentit të Republikës. Nuk kam asnjë arsye të paragjykoj votën time e as qëndrimin tim. Unë qëndrimin tim do ta shpreh në komisionin hetimor që unë drejtoj dhe votën time do ta shpreh në seancë plenare së bashku me gjithë kolegët e mi të mazhorancës”, tha ai.
