Reshjet e dendura të shiut që kanë përfshirë vendin, kanë ngritur alarmin për përmbytje. Me anë të një njoftimi të shpërndarë në faqen e Facebook-ut të Bashkisë Vlorë, apelohet ndaj qytetarëve që të shmangin lëvizjet e panevojshme me makinë, pasi reshjet do të vijojnë të dendura.
Bashkia tërheq vëmendjen qytetarëve për vendin e parkimit të makinave. Sipas Bashkisë, qytetarët duhet të kenë kujdes të veçantë për vendet që rrezikojnë të përmbyten. Duke iu referuar meteorologëve, kushtet e përkeqësuara të motit dhe reshjet e dendura do të vijojnë përgjatë gjithë javës.
Statusi
Të dashur qytetarë!
Duke parë kushtet e motit në Vlorë, por edhe në të gjithë vendin, do ju luteshim të shmangni lëvizjet me makina që nuk janë të domosdoshme. Për shkak të shirave të dendur, duhet të keni kujdes edhe me vendin e parkimit të makinave dhe të jeni të vëmendshëm për vendet që rrezikojnë të përmbyten! Paralajmërimet e meteorologëve për shira të vazhdueshëm, na bëjnë të jemi të kujdesshëm.
Kujdesuni për veten dhe familjarët tuaj!
Për çdo nevojë vendosni kontakt me Ujësjellës Kanalizimet dhe Shërbimet publike të Bashkisë.
