Kryeministri Edi Rama ka folur në programin e financimit të BE-së për restaurimin dhe rrjetëzimin e monumenteve të kulturës të dëmtuara nga tërmeti i nëntorit, që shkaktoi të vdekur dhe dëme të konsiderueshme materiale. Ai indirekt iu përgjigj ashpër opozitës ndërsa pohoi se paratë që dhurohen nga BE, administrohen nga vetë ata. Lidhur me të gjithë zërat kundërshtues dhe më tepër akuzues nga opozita, kreu i qeverisë nënvizoi ndër të tjera se qeveria nuk mori një thes me para dhe e tretën, por çdo lëvizje monitorohet me mjaft kujdes.
“BE-ja u gjen pranë nesh në një moment të vështirë. Përsa i përket fondeve, një pjesë e atyre që sytë i kanë po nuk duan të shohin, veshët i kanë po nuk duan të dëgjojnë, mendjen e kanë po nuk duan që ta vënë në punë, se fondet e sjella nga donatorët administrohen nga vetë donatorët.
Këshilli Evropian me një strukturë të posaçme UNOPS, do të administrojë nga pikëpamja tekniko-financiare të gjithë programet e rindërtimit e trashëgimisë dhe shkollave.
Administrimi i taksave të evropianëve është përgjegjësi e vetëm e tyre. Kush thotë se kush i vodhi paratë, ku shkuan paratë, duhet të hapi mendjen për të dëgjuar këtë të vërtetë. Të gjitha fondet administrohen prej tyre.
Nuk na lanë një thes dhe ne e morëm e tretëm, siç u thotë mendja atyre që i morën paratë në të shkuarën dhe kujtojnë se janë të gjithë si ata.
I kërkoj ndjesë partnerëve për këtë sqarim të domosdoshëm. Soreca nuk bën thjesht detyrën si ambasador i BE-së, por është një mik shumë i mirë i shqiptarëve.
Një partner i rëndësishëm në këtë proces, falë të cilës ne kemi pasur një raport shumë serioz dhe domethënës pas konferencës së donatorëve”, deklaroi Rama.
