Pasi ktheu në Kuvend për rishqyrtim Kodin e ri Zgjedhor, kreu i shtetit Ilir Meta ka sqaruar arsyet përse e ndërmori këtë akt.
Në një prononcim për mediat nga Korça, presidenti theksoi se arsyet se pse dekreti u kthye në Kuvend, ishte fakti që të kthehej në shina marrëveshja e 5 qershorit.
Meta tha se kthimi pas i ligjit në Kuvend është një tjetër mundësi për mazhorancën socialiste.
“Sapo është publikuar. Reagimi i menjëhershëm i PPE, pasi Kuvendi votoi në mënyrë të njëanshme këto ndryshime dhe thirrja e tyre për t’a kthyer këtë akt në Kuvend, dhe rikthimin e aktit në shinat e marrëveshjes së 5-qershorit, ishte një mundësi tjetër për mazhorancën. Të respektojë këtë marrëveshje gjithpërfshirëse, në të kundërt do të mbajë përgjegjësi për këtë ndryshim të rregullave të lojës. Dhe ç’është më e rëndësishmja, të shkeljes së procesit të negociatave”, u shpreh Meta.
Presidenti u pyet edhe për lëvizjen e radhës, nëse socialistët nuk tërhiqen. “Presidenti është shumë i qetë, pasi është në një gjatësi vale me popullin shqiptar, pavarësisht preferencave partiake dhe politike, apo atyre që janë pa parti.
Duhet t’i jepet fund kësaj krize artificiale dhe mungese skandaloze të përgjegjshmërisë. Mazhoranca të reflektojë. Presidenti është i qetë dhe në një gjatësi vale. Në rast se do të kemi këmbëngulje për të penguar zgjedhjet dhe integrimin, presidenti do të jetë me të gjithë popullin, për të treguar se shqiptarët janë një dhe pa dallim”, deklaroi Meta.
