Pas deklaratës së kryeministres serbe, Ana Bërnabiç se shqiptarët janë “njerëz që vijnë nga mali”, ka ardhur dhe reagimi i Bashkimit Evropian.
Në reagimin e BE-së thuhet se çdo retorikë që është fyese, konfrontuese dhe ndarëse, është kundër frymës së bashkëpunimit dhe pajtimit që i duhet rajonit për të ecur përpara.
Ndërkohë, zëdhënësja e shefes së Punëve të Jashtme të BE-së Federica Mogherini, Maja Kocijançiç, tha se ngjarjet e ditëve të fundit kanë treguar qartë se dialogu mes Prishtinës dhe Beogradit, duhet të rezultojë me një marrëveshje të qëndrueshme dhe afatgjatë për normalizim të marrëdhënieve dhe se status-quoja nuk është mundësi.
Kujtojmë se ditën e djeshme reagoi dhe presidenti i Kosovës, Hashim Thaçi dhe ministri i Jashtëm, Behgjet Pacolli.
Thaçi tha se gjuha e përdorur nga Ana Bërnabiç, është një tjetër dëshmi e urrejtjes patologjike të regjimit aktual të Serbisë kundër qytetarëve të Kosovës, ndërsa Pacolli u shpreh se ajo nuk do të mund të hyjë në Kosovë për sa kohë ndjek një ideologji raciste dhe të sëmurë kundër popullit të Kosovës dhe etnive që jetojnë këtu.
