Ku na ndajnë dhe 10 ditë nga 30 qershori, dita e zgjedhjeve kryetarja e LSI deklaroi se fundi i Edi Ramës do të jetë në filxhanin e Monika Kryemadhit. Ajo deklaroi se më 30 qershor nuk do të ketë zgjedhje lokale, por do të zgjidhen kryetarët e Partisë Socialiste.
“Si fallxhore që jam, në datë 30 Edi Rama nuk ka për të bërë dot zgjedhje. Sepse ato nuk janë zgjedhje, bëhen me kandidatë alternativë. A me votimet e veta, këta le ta shikojmë çdo vendosi populli. Opozita nuk ka një program për të vepruar dhe për të ndaluar zgjedhjet, nuk do të ketë përplasje civile, pasi ato do të jenë zgjedhje për Partinë Socialiste.
Ne nuk do të ndjekim një të çmendur nga mbrapa. Ka një dekret të presidentit i cili hyn në fuqi menjëherë pasi u botohet në fletoren zyrtare. Më 30 qershor nuk do të ketë luftë civile, as bllokim qendrash votimi, por fundi i Edi Ramës do të përfundojë në filxhanin e Monika Kryemadhit”, u shpreh Kryemadhi.
Ndërsa nesër opozita ka programuar protestën e radhës kombëtare, e cila zhvillohet në një situatë të jashtëzakonshme. Presidenti Meta anuloi datën e zgjedhjeve, por mazhoranca qeverisës nuk e njeh atë.
Nisur nga ky dekret, kryebashkiakët e opozitës kanë kërkuar largimin e materialeve zgjedhore nga KZAZ-të e ngritura duke sjellë dhe përplasje. Por çfarë do të ndodh në protestën e së premtes?
“Protesta do të jetë paqësore, do ta menaxhojmë me përgjegjshmëri të plotë. Nuk kanë faj policët e shtetit. Mos harroni që nuk është më tashmë në dorën tonë, çdo ditë që Rama provokon populli aq më shumë irritohet”, tha kryetarja e LSI-së, Monika Kryemadhi.
