Kryebashkiaku i Gjirokastrës, Flamur Golemi, në kundërshtim me urdhrin e qeverisë për ndalimin e muzikës pas orës 20:00, ka nxjerrë në sheshet e qytetit grupin e polifonisë dhe ja ka marrë këngës. Banorët dhe turistët e paktë që kishin zgjedhur Gjirokastrën, shijuan të qetë këngët, ndonëse është e ndaluar rreptësisht grumbullimi për shkak të pandemisë.
“Po the Gjirokastra i ke thënë të tëra”, ka shkruar Golemi bashkëngjitur videos së shpëndarë në Facebook.
Me vendim të qeverisë shqiptare, janë ndaluar klubet e natës, diskot, lounge bar dhe çdo lloj shërbimi i kësaj natyre. Njoftimi është dhënë nga Ministrja e Shëndetësisë dhe Mbrojtjes Sociale, Ogerta Manastirliu, e cila theksoi se prioritet për qeverinë shqiptare është mbrojtja e jetës së qytetarëve.
“Kemi konstatuar që në këtë periudhë, ato janë kthyer në vendgrumbullime të rinjsh, ku injorohet totalisht zbatimi i masave për parandalimin e infeksionit, duke i shndërruar në vatra potenciale të infeksionit. Të rinjtë bëhen kështu bartës të virusit në dëm të më të moshuarve. Nga sot, qeveria i thotë stop kësaj sfide që i bëhet rregullave të vendosura për të parandaluar pandeminë. Prioriteti ynë numër 1 është mbrojtja e jetës së qytetarëve”, ka thënë më herët Manastirliu.
