Kryedemokrati Basha ka mbërritur në Presidencë, ndërsa ka nisur takimin ‘kokë më kokë’ me Metën. Dita e sotme pritet të jetë tepër e ngarkuar politikisht.
Meta dhe Basha do të diskutojnë për krizën politike, kur kanë mbetur edhe tre ditë nga votimet e 30 Qershorit, dhe palët nuk tërhiqen nga qëndrimet respektive. Ky takim mes tyre vjen pas ftesës së presidentit. Të njëjtën ftesë Meta ia drejtoi edhe kryeministrit Rama, por ky i fundit e refuzoi publikisht, duke deklaruar se ishte i zënë për shkak të fushatës.
“Për shkak të fushatës elektorale që po zhvillohet sipas dekretit presidencial, ku 30 qershori është përcaktuar datë zgjedhjesh, kabineti im ka komunikuar telefonikisht pamundësinë për këtë takim. Po meqë Ilir Meta vazhdon të luajë letrash, ja dhe me shkrim: Kemi zgjedhje, jam i zënë!”, shkruante ai në Twitter.
Kreu i Shtetit informoi se do të jetë në Presidencë deri në orën 13:00, për të pritur kryeministrin Rama.
