Para se të niste seanca për zgjedhjen e Kreut të Shtetit, u shënua krisja e parë mes Sali Berishës dhe Ilir Metës, pasi ish-kryeministri i kërkoi Metës që të mos firmoste dekretin për shkarkimin e Begajt, pasi sipas tij, rrezikohej e ardhmja e vendit. Madje Berisha shkroi në rrjetet sociale se ky emërim është antikushtetues dhe i rrezikshëm për demokracinë shqiptare. Ai i bëri thirrje Metës të mbronte Kushtetutën, dhe të mos lejonte këtë dhunim flagrant e tejet të rrezikshëm. Por kërkesa e tij nuk u mor parasysh.
Pavarësisht kësaj, Meta firmosi dorëheqjen e Begajt nga Shefi i Shtabit të Përgjithshëm të Ushtrisë, për shkak se ligji e kërkon dhe detyron që ushtarakët s’mund të zgjidhen në pozicione të rëndësishme politike. Dekretimi i lirimit nga detyra u firmos nga Presidenti Meta në Stamboll, pasi Presidenti ndodhej atje për të marrë pjesë në një forum ndërkombëtar. Lidhur me këtë çështje, një koment ka ardhur edhe nga kryetarja e LSI-së, Monika Kryemadhi, e cila tha se nuk është juriste, që të diskutojë dekretet e Presidentit. Ajo foli në një intervistë për “News24” lidhur me procesin e zgjedhjes së Presidentit të ri, Bajram Begaj. Sipas Kryemadhit, Berisha mund t’i drejtohet Gjykatës Kushtetuese, për të qartësuar situatën.
“Për hir të së vërtetës, nuk jam juriste konstitucionaliste, që të diskutoj dekretet e Presidentit nga ana Kushtetuese. Mendoj që mund t’i drejtohen Gjykatës Kushtetuese, e cila do ta bënte çdo gjë më të qartë. Duke iu drejtuar asaj, marrin përgjigje dhe deklaratat e Berishës.
Nuk kam asgjë personale me Begajn, madje i uroj suksese në postin e tij të ri, por theksoj se të qenit President kërkon integritet, pavarësi veprimi e mendimi, si dhe atdhedashuri. Nuk e di nëse kjo do të jetë e mundshme për të, duke pasur parasysh një qeveri autokrate.
I gjithë procesi ishte jokonsensual, përjashtues. Kushtetuta thotë që nuk duhen përjashtuar palët, por duhen përfshirë në debat. Për mua mund të ishte President një gazetar, një analist që kishte pavarësi politike dhe integritet. Ajo që të bën përshtypje është verdikti i votës së mazhorancës, që i ka dhënë të drejtë të zgjidhet President pa konsensus”, tha Kryemadhi.
