Pas takimit me Kryeministrin Rama dje, Gunther Krichbaum, Kryetar i Komisionit të Çështjeve të BE në Bundestag, ka reaguar duke shkruar në faqen e tij në Facebook:

Dje e kam mirëpritur Kryeministrin e Shqipërisë, Edi Rama […] E shfrytëzova këtë mundësi për t’i thënë personalisht se unë besoj se hapja e negociatave të pranimit për të hyrë në BE është ende herët. Reformat në Shqipëri nuk kanë shkuar ende aq larg.

Kjo deklaratë konfirmon se qëndrimi i Kirchbaum mbi hapjen e negociatave mbetet negative, madje edhe pas takimit me Rama.

Menjëherë pasi Komisioni Europian rekomandoi hapjen e negociatave të pranimit me Shqipërinë, deputeti gjerman deklaroi në një intervistë me Deutsche Welle se “rekomandimi i Komisionit Evropian […] nuk është i mjaftueshëm”. Gjithashtu Deutche Welle shkruan se Krichbaum ka anuluar vizitën që kishte planifikuar të zhvillonte në Shqipëri në fillim të muajit maj.  

Krichbaum shprehu të njëjtin mendim gjatë një interviste me Tagespiegel më 20 mars, ku deklaroi se ende është shumë herët për të hapur negociatat, duke shtuar se “korrupsioni dhe nivelet e larta të krimit të organizuar mbeten një problem”.

Në një konferencë shtypi dhënë pas vizitës së tij, Kryeministri Edi Rama e hodhi poshtë Krichbaumin si “një nga unë nuk e di sa qindra anëtarë të Bundestagut. Kjo është pesha e mendimit të tij. ”