Mazhoranca konsideron Arta Vorpsin kandidaten e renditur nga Këshilli i Emërimeve në Drejtësi në krye të listës e cila i është vënë në dispozicion institucionit të Presidentit, automatikisht të zgjedhur si anëtare të Gjykatës Kushtetuese.
Kreu i Komisionit të Ligjeve Ulsi Manja, shpjegon se dhe pse Kreu i Shtetit nuk ushtroi të drejtën e dekretimit të një kandidature për vendin vakant në Gjykatë, mekanizmi zhbllokues që parashikon Kushtetuta, mundëson që Vorpsi të shpallet anëtare e Kushtetueses.
Presidenti i Republikës në letrën drejtuar KED-së, argumenton pamundësinë për të përzgjedhur një emër për anëtar të Kushtetueses nisur nga fakti se radha e përzgjedhjes është e Parlamentit. Argument me të cilin Manja nuk pajtohet.
Manja thotë se kjo nuk është logjika e ligjvënësit, i cili ka parashikuar mekanizmat zhbllokues.
Kryekomisioneri i Ligjeve thotë se Presidentit i ka skaduar këtë të premte afati 30 ditor për të dekretuar emrin e dytë për anëtar të Kushtetueses.
Ndërkohë që këtë të drejtë Kuvendi do ta ushtrojë në seancën plenare të së hënës, ku do të votojë për zgjedhjen e dy anëtarëve të Gjykatës më të lartë në vend, ku për secilin nevojiten të paktën 84 vota. /balkanweb
