Federata e Futbollit të Kosovës ka pezulluar nga detyra një arbitër, pasi postoi në rrjetet sociale një foto ku krahasonte Albin Kurtin me diktatorin e Koresë së Veriut, Kim Jong-Un.
Gjyqtari i ndeshjeve, Qëndrim Vata kishte shpërndarë në Facebook një fotomontazh ku ishte vënë fytyra e kryeministrit ende në detyrë të Kosovës në trupin e diktatorit korean.
Ky postimi pati një reagim të madh, pasi u postua direkt pas rrëzimit të qeverisë Kurti, mbrëmjen e djeshme.
Arbitri u justifikua duke thënë se i kanë vjedhur adresën e Facebook dhe se nuk e kishte bërë ai statusin.
Kuvendi i Kosovës miratoi mbrëmjen e djeshme mocionin e mosbesimit ndaj qeverisë së Albin Kurtit. Ishte Lidhja Demokratike e Kosovës ajo që e inicioi këtë mocion, pasi Kurti shkarkoi ministrin e Brendshëm, Agim Veliu.
