Votimi në mbledhjet e Kuvendit të Kosovës është i përcaktuar me Rregulloren e Punës, e që mund të bëhet në disa mënyra: a) Votim i hapur, me ngritje të dorës; b) votim i fshehtë; c) votim i regjistruar, që e përfshin votimin elektronik; d) votimin duke e thirrur secilin deputet, veç e veç.
Shpjegimin në detaje të procesit të votimit të kryeparlamentarit dhe përbërjes së qeverisë së re të Kosovës e bën Albert Krasniqi nga KDI, i cili monitoron punën e Kuvendit
Krasniqi ka thënë se për mënyrën e votimit vendos Kuvendi me shumicën e votave të deputetëve të pranishëm, përveç në rastet kur me Kushtetutë parashihet ndryshe.
“Këto rregulla vlejnë edhe për zgjedhjen e Kryetarit të Kuvendit dhe të Kryeministrit. Ta zëmë, mundet që një grup parlamentar të kërkoj votim të fshehtë për atë pikë të rendit të ditës”, tregon ai.
Më tej, hulumtuesi i KDI-së thotë se kryesuesi i seancës duhet ta hedh këtë propozim në votim në Kuvend. Nëse shumica e deputetëve të pranishëm votojnë në favor të këtij propozim, atëherë votimi bëhet i fshehtë, që nënkupton përmes hedhjes së fletëvotimeve në kutinë e votimit”, është shprehur Krasniqi, raporton Indeksi.
Ndryshe, seanca konstituive pritet të mbahet me 3 gusht, pas vendimit të presidentit të Republikës, Hashim Thaçi.
