Kryetari i Komisionit për Kosovën në Kuvendin e Serbisë, Milovan Drecun, ka deklaruar se aksioni i Njësisë Speciale të Kosovës rreth vendosjes së reciprocitetit për targat e mjeteve që vijnë nga Serbia, ishte planifikuar paraprakisht.
Ai tha se “KFOR -i duhet të sigurojë lirinë e lëvizjes”. Po sipas tij, “nuk ka dyshim se KFOR-i kishte njohuri për lëvizjen e njësive speciale, në këtë rast, siç thotë ai, që është Njësia Speciale e Kosovës”.
Bashkimi Evropian i bëri thirrje Prishtinës dhe Beogradit, që të ndërmarrin masa për t’i ulur tensionet në veri të Kosovës, pasi Kosova nisi të zbatojë masa reciprociteti me makinat me targa serbe.
Sakaq, kryeministri i Kosovës ka vënë në dukje se një masë e tillë, nuk synon destabilizimin ose të provokojë, por ka mbrojtur vendimin e qeverisë së tij duke thënë se 15 shtatori i vitit 2021 ishte afati i fundit ku do të duhej të mbyllej marrëveshja e arritur në Bruksel mes Kosovës dhe Serbisë.
