Qeveria e Kosovës mori vendimin për të vendosur reciprocitet me shtetin serb, sa i përket targave të makinave. Dokumenti i cili është firmosur nga Ministri i Brendshëm, Xhelal Svelça, ndalon hyrjen në territorin e Kosovës të të gjithë automjeteve me targa serbe. Si zgjidhje është ofruar mundësia e pajisjes së tyre me targa të përkohshme të Republikës së Kosovës, kohëzgjatja e të cilave është 60 ditë.
Autoritetet në Kosovë bëjnë me dije se një vendim i tillë është marrë në përputhje me Marrëveshjen e Brukselit për lëvizjen e lirë, e cila u arrit në korrik të vitin 2011 në dialogun teknik ndërmjet Kosovës dhe Serbisë.
Në këtë marrëveshje përcaktohet që të gjithë pronarët e mjeteve që banojnë në Kosovë, duhet të përdorin targat ‘KS’ (Kosovë) ose ‘RKS’ (Republika e Kosovës) dhe kështu t’i hiqnin nga përdorimi targat që për serbët e Kosovës i lëshonte Ministria e Punëve të Brendshme e Serbisë.
Forca policore në pikat kufitare në veri të Kosovës
Në kuadër të zbatimit të këtij vendimi, në pikat kufitare në veri të Kosovës janë vendosur forca të mëdha policore. Ministri Sveçla ka bërë të ditur se shtimi i forcave policore në veri të vendit, është në kuadër të zbatimit të marrëveshjes për lëvizjen e lirë- konkretisht targave të automjeteve.
Kryeministri Kurti
Në seancën e parë të sesionit vjeshtor të Kuvendit të Kosovës, kryeministri Albin Kurti sqaroi se kjo marrëveshje ka 10 vite që është vendosur në zbatim nga pala serbe. Shefi i ekzekutivit kosovar ka sqaruar se vendimi i marrë dje, nuk ka asnjë qëllim që të cënojë lëvizjen e lirë të qytetarëve të Serbisë, apo të provokojë destabilizim.
“Si kryeministër ju siguroj se veprimet e ndërmarra sot nga organet kompetente për zbatimin e kësaj nuk janë drejtuar kundër qytetarëve serb, nuk kanë për qëllim të cenojnë lëvizjen e lirë qytetarëve serbë apo të provokojnë çfarë do destabilizimi.
Pres nga të gjithë ta kuptojnë drejt se sot nuk po ndodh asgjë e jashtëligjshme, sot po fillon zbatimi i një marrëveshje me të cilën është pajtuar edhe Serbia”, tha Kurti.
Kurti e ka konsideruar marrjen e këtij vendimi, jo si dëshirë të Kosovës, por si imponim nga ana e Serbisë. “Targat e përkohshme nuk janë dëshira jonë, por një imponim nga ana tjetër. Qytetarët tanë kanë paguar për targa të tilla në hyrje të Serbisë për dhjetë vjet”, tha ai.
Kosova, tema kryesore e Këshillit të Sigurisë në Serbi
Presidenti serb Aleksandar Vuçiç do të kryesojë sot seancën e Këshillit të Sigurisë Kombëtare, në të cilën, siç pritej, tema kryesore do të jenë ngjarjet e fundit në Kosovë.
Sipas njoftimit të zyrës së tij për media, seanca është caktuar për në orën 10:00 në Pallatin e Serbisë.
Ky takim është thirrur pasi të hënën, Kosova vendosi masën e reciprocitetit për mjetet me targa nga Serbia. /Tirana Today
