Ajo çfarë ka mbetur pas protestës së sotme prej 4 orësh lë vërtetë për të dëshiruar. Siç duket në pamjet e sjella nga Tirana Today, në zonën përreth Parlamentit ku u zhvendos protesta, mund të shohësh vetëm kosha mbeturinash të cilëve u është vënë flaka, gurë e shishe të hedhura përtokë.
Protesta e sotme nisi para Kryeministrisë, për t’u zhvendosur para Parlamentit, ku pati tensione teksa protestuesit hodhën gurë e sende të forta ndaj policëve, për t’u mbyllur më pas në selinë blu me fjalën e Bashës.
Nga protesta mbetën të lënduar pesë persona, mes të cilëve dy punonjës policie. Ende nuk dihet situata aktuale e tyre, ndërsa më herët disa protestues kundërshtuan automjetin e urgjencës që të kalonte në oborrin e Kuvendit për t’i dhënë ndihmën e shpejtë policëve të lënduar.
Kreu i Partisë Demokratike zgjodhi që sot t’u jepte po ashtu një mesazh drejtpërdrejt edhe ndërkombëtarëve, të cilëve u tha në anglisht se “nuk ka stabilitet pa drejtësi, pa demokraci dhe pa barazi”./ Tirana Today
