Ministrja e Shëndetësisë dhe Mbrojtjes Sociale, Ogerta Manastirliu ka publikuar shifrat ditore të të vaksinuarve kundër koronavirusit në vend.
Gjatë ditës së sotme janë vaksinuar 6.310 qytetarë, ndërkohë që numri total i të vaksinuarve ka arritur në 809.992.
Procesi i vaksinimit masiv është shtrirë në të gjithë vendin, ku deri në fund të qershorit synohet të arrihet objektivi deri në 1 milionë vaksinime. Aktualisht, qytetarët po vaksinohen me dozat e Pfizer, AstraZeneca, Sinovac dhe Sputnik V.
#ShqipëriaBuzëqesh? pic.twitter.com/znV4Yg8pov
— Ogerta Manastirliu (@GManastirliu) June 8, 2021
Situata epidemiologjike në vendin tonë vijon të përmirësohet nga dita në ditë. Në 24 orët e fundit, janë regjistruar 13 raste të reja me Covid-19, nga 2.872 testime të kryera.
Ndërkohë, fatmirësisht nuk është regjistruar asnjë viktimë nga virusi gjatë kësaj periudhe kohore. Po në 24 orët e fundit, janë shëruar edhe 34 pacientë, teksa raste aktive mbeten 209.
