Ministrja e Arsimit, Besa Shahini, bëri të ditur se të gjitha shkollat do të mbyllen deri më 23 mars, për një periudhë dy javore nga dita e sotme, që hyri në fuqi plani i veprimit për situatën ndaj koronavirusit.
Pas njoftimit për mbylljen e shkollave për një periudhë dy javore, burime për ‘Report Tv’ bëjnë me dije se studentët që qëndrojnë në konvikte, janë lajmëruar që të shkojnë në shtëpitë e tyre.
Njoftimi
U vendos nga Task Forca për Koronavirusin që të mbyllen institucionet arsimore për periudhë dy javore, deri më 23 mars 2020.
Kjo për arsye frenimi të përhapjes së virusit COVID-19, i cili është shfaqur në dy raste në Shqipëri. Masa është parandaluese dhe frenuese – nuk ka asnjë nevojë e arsye për panik. Po tregohemi shumë të kujdesshëm që të zvogëlojmë maksimalisht mundësinë e përhapjes së këtij virusi.
Mbani mend që fëmijët dhe të rinjtë nuk janë grupmoshë e rrezikuar nga virusi, por mund të jenë bartës. Ndaj, do të pezullohet mësimi në institucionet arsimore.
Masat që secili prej nesh duhet të ndërmarrë individualisht:
• Të lajmë duart shpesh për 20 sekonda;
• Të evitojmë takimin deri në 1 m largësi;
• Të evitojmë grumbullimet e njerëzve.
Po kështu, Autoriteti i Aviacionit Civil njoftoi se vendosi pezullimin e fluturimeve nga Shqipëria në drejtim të Italisë dhe anasjelltas, për shkak të situatës së koronavirusit. Sipas AAC, fluturimet do të ndërpriten me disa nga aeroportet që janë në “zonën e kuqe” të shpallur nga qeveria italiane, ku janë regjistruar numër i madh të prekurish nga koronavirusi.
