Kryeministri Edi Rama vijon të na njohë me masa të reja të marra në lidhje me situatën e krijuar në vend për shkak të përhapjes së koronavirusit.
Kreu i qeverisë bën me dije se qeveria do të ulë pagat e administratës shtetërore. Ai sqaroi se nga kjo ulje pagash do të preken ministrat, deputetët dhe ata që janë krye të institucioneve.
“Ne do të shkurtojmë rrogat tona si qeveri, rrogat e atyre që janë në majë të piramidës. Do të shkurtojmë rrogat e deputetëve të Kuvendit të Shqipërisë. Kjo është simbolike por për të dhënë mesazhin se do të lëmë diçka në mënyrë që ata që nuk kanë se me çfarë të shtyjnë në fund të muajit të kenë diçka”, tha Rama në Top Channel.
Ditët e fundit qeveria ka marrë disa masa kufizuese për të frenuar përhapje e koronavirusit në vend. Qarkullimi i makinave dhe lëvizja në këmbë është e lejuar vetëm në orare të caktuara. Ndërsa edhe shumica e bizneseve janë mbyllur përkohësisht deri në një njoftim të dytë.
Deri më tani në Shqipëri janë konfirmuar 64 të prekur nga koronavirusi dhe 2 viktima.
