Koronavirusi vdekjeprurës do të zgjasë disa muaj. Këtë e ka konfirmuar drejtori i Departamentit të Sëmundjeve Infektive të Institutit të Lartë të Shëndetit, Profesor Gianni Rezza.
“Bashkëjetesa midis Italisë dhe koronavirusit do të jetë e gjatë. Kemi një numër të vogël rastesh. Kemi arritur gjeneratën e dytë ose të tretë të infeksioneve”, ka thënë ai. Gianni Rezza ka qetësuar qytetarët, duke thënë se përhapja e koronavirusit është e kufizuar.
“Përhapja e koronavirusit është e kufizuar. Rastet e reja janë pothuajse të gjitha që i atribuohen epiqendrës së epidemisë në zonën e Lodi dhe dy shpërthimeve më të vogla në Veneto”. Por Rezza është edhe realist teksa thotë se “Ende presim një rritje të numrit të të infektuarve, dhe masat e marra po japin efektet e pritura”.
Përpos Italisë, koronavirusi është tashmë edhe në Greqi. Autoritetet e këtij shteti kanë konfirmuar rastin e parë të koronavirusit të mërkurën. Pacientja është një 38-vjeçare nga Selaniku, e cila kishte ardhur nga Italia, ka thënë Sotiris Tsiodras, përfaqësues i Ministrisë së Shëndetësisë. “Ajo nuk është në gjendje të rëndë dhe po monitorohet prej një ekipi kolegësh të jashtëzakonshëm në Selanik”, ka thënë Tsiodras gjatë një konference shtypi, raporton Reuters.
