Koronavirusi deri më tani ka shkaktuar 11 viktima në Shqipëri, ndërsa 223 persona rezultojnë të infektuar.
Ndërkohë së fundmi ka reaguar Organizata Botërore e Shëndetësisë në Shqipëri, duke u dhënë një këshillë mjaft të rëndësishme qytetarëve shqiptarë.
Këshilla lidhet me duhanpirjen.
“Duhanpirja dëmton mushkëritë dhe pjesë të tjera të trupit tuaj, dhe ju bën më të cënueshëm nga infeksioni i COVID-19. Është koha e duhur për t’i dhënë fund ? duhanpirjes për një shëndet më të sigurt dhe më të mirë”, shkruan OBSH në një postim në Facebook.
Kujtojmë se në Spitalin Infektiv aktualisht janë 74 pacientë të shtruar nga të cilët 7 janë në terapi intensive, prej të cilëve, 4 janë të intubuar.
Spitali “Shefqet Ndroqi” është spitali i dytë COVID-19, i cili deri më tani ka vetëm një pacient të shtruar.
Ditën e sotme Drejtuesja e Institutit të Shëndetit Publik, Albana Fiço tha se qytetet më të prekura janë Tirana, me 124 raste, ose 60 përqind të totalit, e pasuar nga Fieri me 23 raste dhe Durrësi e Korça me nga 14 raste secila. Në total janë 16 qytetet ku janë regjistruar raste të personave me COVID-19.
“Për rastet e zbuluara, po kryhet hetimi epidemiologjik dhe po punohet me shumë intesitet nga epidemiologët për gjurmimin e kontakteve të rasteve pozitive dhe ndërprerjen e zinxhirit të transmetimit të infeksionit”, tha më herët Fiço.
