Presidenti Ilir Meta dhe kryeministri Edi Rama duket se i kanë lënë mënjanë dallimet politike dhe janë përqendruar të dy në luftimin e koronavirusit.
Parashtrimin e mësipërm e la të nënkuptohej vetë Kreu i Qeverisë ditën e sotme përgjatë një interviste televizive.
Madje Rama tha fjalët më të mira për Kreun e Shtetit.
“Përplasjet e mëparshme kanë qenë të diktuara nga pozicionet e mëparshme dhe për tema të mëparshme. Po t’i kthehemi aty nuk do ndryshonin pozicionet tona. Ne jemi në situatë tjetër.
Pozicioni i Presidentit, për hir të së vërtetës, ka qenë korrekt.
Presidenti ka kryer detyrën e tij me një përmasë përgjegjshmërie dhe njerëzillëku që është për t’u lavdëruar.
Ajo që kemi sot është një situatë ku të gjithë duhet të jenë bashkë. Kjo është një situatë, ku nuk po luftojmë për vota, por për jetën e njerëzve.
Botërisht dhe në Europë të gjitha opozitat që kanë vijuar ‘këngën’ kanë rënë ndjeshëm në sytë e opinionit publik. Presidenti që para kësaj situate ishte bërë njësh me opozitën tani është bërë njësh me popullin e qeverinë dhe nuk shoh asnjë arsye për të thënë që po bën gjënë e duhur dhe meriton respektin.
Kur është kështu është kështu. Nuk kam pse mos ta them. Bashkëpunimi me Presidentin ka qenë perfekt”, deklaroi Rama.
