Italia është shndërruar në epiqendrën e koronavirusit që ka vetëizoluar një pjesë të madhe të njerëzimit.
COVID-19 në Itali ka marrë shumë jetë njerëzish, ndërkohë kryeministri i shtetit fqinj Giuseppe Conte po merr masa të njëpasnjëshme për të mbajtur situatën nën kontroll.
Kreu i qeverisë italiane ka lajmëruar ndalimin e aktiviteteve joprodhuese në të gjithë Italinë.
Ai theksoi se supermarketet, farmacitë, bankat, shërbimet postare të mbeten të hapura, ndërsa theksoi se transporti është i garantuar.
Conte i bëri thirrje qytetarëve të mos krijojnë panik duke nxituar për të bërë blerje. Ai njoftoi se masat e reja do të fillojnë të hënën, më 23 Mars.
“Është një vendim shumë i vështirë, por i domosdoshëm. Të dhënat e fundit flasin për një emergjencë që nuk pritet të ngadalësohet”, deklaroi kryeministri i Italisë.
